ପ୍ରବଳ ବରଫ ଝଡ ଯୋଗୁଁ ଆମେରିକାବାସୀଙ୍କ ଅବସ୍ଥା ବେହାଲ । ବରଫ ଝଡ଼ ଯୋଗୁ ପାଖାପାଖି ୫୦ ଜଣଙ୍କ ଜୀବନ ଯାଇଛି । ଠପ୍ ହୋଇଯାଇଛି ଅନେକ ସହର । ନ୍ୟୁୟର୍କ ସହରରେ ୪୩ ଇଞ୍ଚ ବରଫ ଜମା ହୋଇ ରହିଥିଲା । ଆମେରିକାର ୫୫ ନିୟୁତରୁ ଅଧିକ ଲୋ ପ୍ରବଳ ଶୀତରେ ପ୍ରଭାବିତ ହୋଇଛନ୍ତି ।
ଦକ୍ଷିଣପୂର୍ବ, କେନ୍ଦ୍ରୀୟ ପୂର୍ବ ଏବଂ ପୂର୍ବ ଉପକୂଳରେ କିଛି ପ୍ରମୁଖ ସହରରେ ପ୍ରବଳ ଥଣ୍ଡା ଅନୁଭୂତ ହେଉଛି । ବରଫ ଝଡ଼ ଯୋଗୁଁ ୧୩ଟି ରାଜ୍ୟରେ ପାୱାର ଗ୍ରୀଡ ପ୍ରଭାବିତ ହୋଇଛି । ୨ ଲକ୍ଷରୁ ଅଧିକ ଲୋକ ଅନ୍ଧାରରେ ଅଛନ୍ତି । ଲୋକମାନଙ୍କୁ ଶକ୍ତି ସଂରକ୍ଷିତ କରି ରଖିବା ପାଇଁ ନିର୍ଦ୍ଦେଶ ଦିଆଯାଇଛି ।
ଆମେରିକା ପରି ଜାପାନରେ ମଧ୍ୟ ପ୍ରବଳ ତୁଷାରପାତ ଯୋଗୁ ୧୭ ଜଣଙ୍କ ମୃତ୍ୟୁ ହୋଇଛି । ୯୦ରୁ ଅଧିକ ଆହତ ହୋଇଛନ୍ତି । ଗତ ସପ୍ତାହରୁ ଜାପାନର ଉତ୍ତରାଞ୍ଚଳରେ ପ୍ରବଳ ବରଫପାତ ହେଉଛି । ଜାପାନର ଶତାଧିକ ଲୋକ ଅନ୍ଧାରରେ ରହିଛନ୍ତି । ରାସ୍ତା ଉପରେ ଅନେକ ଗାଡି ଫସି ହୋଇ ରହିଛି । ବରଫ କାଢିବା ସମୟରେ ସତର୍କତା ଅବଲମ୍ବନ କରିବା ପାଇଁ ପ୍ରଶାସନ ପକ୍ଷରୁ କୁହାଯାଇଛି ।